Na Geofrey Duma.
Mara nyingi udhaifu na uvivu wa kusali/kuomba hutokea kwa sababu ya mambo kama uchovu, hali ya kiroho kushuka, au kukosa nidhamu ya kiroho. Lakini kuna njia za kupata nguvu na kurudisha moto wa maombi. Zingatia mambo haya 10 ambayo yanaweza kukusaidia kushinda udhaifu na uvivu wa kuomba:
1. Omba msaada wa Roho Mtakatifu
Kiri kwa Mungu udhaifu wako na umwombe Roho Mtakatifu akupe hamu, nguvu na neema ya kuomba. (Warumi 8:26 – Roho hutuombea kwa kuugua kusikoweza kutamkwa).
2. Kuwa na muda maalum wa maombi
Weka ratiba ya muda wa kuomba kila siku – iwe asubuhi, mchana, au usiku. Nidhamu ya muda itasaidia maombi yako kuwa tabia na siyo jambo la hisia pekee.
3. Anza na maombi mafupi
Usijilazimishe kuanza na saa moja ya maombi. Hata dakika 5–10 kwa uthabiti kila siku zitakusaidia kuanza, kisha polepole ongeza muda.
4. Sali kwa kutumia Neno la Mungu
Soma na tafakari maandiko kisha yasali. Neno la Mungu linachochea imani na linakupa maneno ya kuomba. (Yohana 15:7).
5. Kuwa na sehemu tulivu ya maombi
Chagua mahali pazuri pasipo na usumbufu. Sehemu ya pekee inaweza kukusaidia kuzingatia na kuingia kwa urahisi katika maombi.
6. Andika ombi au mada za kuombea
Tengeneza prayer journal au orodha ya mahitaji ya kuombea. Hii itakuongoza na kuondoa uvivu wa “sijui nitaomba nini.”
7. Shirikiana na wengine
Jiunge na vikundi vya maombi, rafiki wa kiroho au familia. Maombi ya pamoja hujenga motisha na kukufanya uwe na uwajibikaji.
8. Funga pamoja na kuomba
Kufunga hukufundisha nidhamu na hukupa nguvu ya kiroho. Unapokata vitu vya mwili (chakula, mitandao, burudani) moyo wako unapata nafasi ya kumtafuta Mungu zaidi.
9. Kumbuka matunda ya maombi
Tafakari ni mara ngapi Mungu alijibu maombi yako au ya wengine. Hii itakuinua na kukupa sababu ya kuendelea kusali.
10. Usisubiri hisia, chukua hatua
Usiombe tu wakati unapojisikia. Fanya maombi kuwa wajibu wa kila siku – kama kula au kupumua. Kadiri unavyoendelea, maombi yatageuka kuwa shauku na siyo mzigo.
👉 Kumbuka: Maombi siyo mashindano ya muda au masala mengi yakuomba au maneno mengi, bali ni ni nia ya kuongea na kuwasiliana na Mungu wako sirini.
0 Comments